په پېښور کې په نرښځیانو یوه بله وژونکې حمله شوې ده چې پکې دوه نرښځیان سخت ژوبل شوي دي. ډاکټران د یو نرښځي حالت مرګونی ښیي.
په پېښور کې د نرښځیانو د سازمان یو مشر ارزو خان وي او ای ډيوه ته دا پېښه تایید کړې اؤ وایي دا نرښځیان د جمعې په ماسخوتن د پېښور کوهاټ اډې سره نزدې د وسله والو په یو برید کې ژوبل شوي دي.
ارزو وایي د ژوبل شوؤ نرښځیانو نومونه مهک اؤ جیا دي چې یو پکې د پېښور اؤ بل د نوښار اوسېدونکی دی .
په پېښه کې ژوبل شوي نرښځيان د علاج لپاره د پېښور لیډي ریډنګ روغتون ته رسولي اؤ د یاد روغتون ویاند عاصم خان ډیوه ته ویلي چې جیا نومې نرښځی درې ډزې لګیدلی اؤ ډاکټران یې حالت د ډاډ وړ نه بولي خو وایي بل نرښځی مهک بیا په پښه یوازې یو ډز لګیدلی اؤ حالت یې ښه دی.
دا چې دا برید چا کړی اؤ پولیسو یې پر ضد څه اقدام کړی؟ ډیوه ددې معلوماتو ترلاسه کولو لپاره د اړونده پولیس تاڼې سره د ټيليفون له لارې د تماس نیولو هڅه وکړه خو د تاڼې مامورینو زنګ ته هیڅ ځواب ونه ویلو.
تر دې وړاندې د مارچ په میاشت کې هم په پېښورکې نامعلومه کسانو په نرښځيانو ډزې کړي وې چې يو نرښځی پکې وژل شوی او درې نور ژوبل شوي وؤ.
په خېبر پښتونخوا کې د نرښځیانو د تنظیم مشره فرزانه وایي په تېر کال 2023م کې په خېبرپښتونخوا کې اته نرښځيان وژل شوي وو، او په روان کال 2024م کې تراوسه پورې په خېبرپښتونخوا کې څلور نرښځيان وژل شوي دي.
د نرښځيانو د نرښځیانو دغه مشرې ډیوه ته ویلي، خېبرپښتونخوا کې د 2015 نه تراوسه پورې 126 نرښځيان وژل شوي او په صوبه کې په خواوشا 3000 نرښځيانو تشدد شوی، ځورول شوي او جنسي تيري ورسره شوي او د هغې مقدمې هم درج شوي دي.
نرښځيان وخت په وخت دعوې کوي چې دوی ته پوره حقونه نه ورکړل کيږي او که تشدد پرې وشي ووژل شي، د هغې سمې مقدمې او پلټنې ونه شي، اول خو په دغو پېښو کې څوک نيول کيږي نه او که ونيول شي هغه خلک بيا خوشي شي د سزاګانو نه بچ شي.
خو پوليس وايي، دوی د قانون ترمخه پلټنې کوي او زياتره نرښځيان بيا د پلټنو په عمل کې نه شامليږي.
د بشري حقونو د څار د نړيوال تنظیم ایمنسټي انټرنېشنل د شمېرو ترمخه په پاکستان کې د اکتوبر کال 2021م او ستمبر کال 2022م تر منځ موده کې نزدې 18 نرښځيان وژل شوي دي او دا په اېشيا کې د قتل کړی شوو نرښځیانو تر ټولو زیاته شمېره ده.
Forum